Як выглядаюць кватэры ў вядомых гістарычных будынках Гомеля? Зазірнулі ў тыя, што можна арэндаваць на суткі
Як адчуць горад і яго гісторыю? Вось вам ідэя – засяліцца на начоўку ў гістарычны будынак. У Гомелі захаваліся дамы міжваеннага часу, якія самі па сабе – ужо архітэктурная цікавостка для тых, хто цікавіцца мінулым горада. «Моцныя Навіны» пашукалі кватэры ў такіх старых дамах – а можа ёсць варыянты, дзе яшчэ захавалася атмасфера тых часоў? Дзелімся тым, да чаго прывялі нашыя пошукі.
Дом-камуна Станіслава Шабунеўскага
Дом-камуна на Леніна, 51, лічыцца пярлінай гомельскага канструктывізму. Дом 1929-1931 гадоў пабудовы вядомага архітэктара Станіслава Шабунеўскага на той час быў самым вялікім жылым домам у БССР. На паверхах уздоўж доўгага калідора ішлі жылыя пакоі, агульныя кухні, санвузлы і пральні. Будынак, акрамя ўсяго, уключаў бібліятэку, дзіцячы сад і сталовую. Гэта першы ў горадзе дом, у якім былі ўсталяваныя ліфты ў 1959 годзе. У вайну, як і многія даваенныя будынкі Гомеля, моцна пацярпеў і пасля быў рэканструяваны. Да пачатку 1980-х дом моцна струхлеў і доўга стаяў закінутым. У пачатку 2010-х была завершана чарговая рэканструкцыя будынка. І былое камунальнае жыллё для чыгуначных работнікаў ператварылася ў элітныя кватэры для багатых гамяльчан. Сёння Дом-камуна – помнік архітэктуры.
Вось такая аб’ява аб арэндзе ў гэтым будынку нам трапілася.
![](https://gomel.media/wp-content/uploads/2024/05/755d3b3d-b2d8-4980-b5f0-1a5fe9beb2e6.jpg)
![](https://gomel.media/wp-content/uploads/2024/05/e7f455dc-bcd0-4086-9166-326e133967dd.jpg)
![](https://gomel.media/wp-content/uploads/2024/05/90924153-099a-415e-8d13-af1290a8306f.jpg)
Кошт арэнды за суткі – 70 рублёў. На наш погляд, атмасфера канструктывізма зусім не адчуваецца, але апынуцца ўнутры будынка дакладна было б цікава.
Тыповая постканструктывісцкая забудова
Яшчэ да пачатку вайны ў 30-40-я гады ў Гомелі пачалі ўзводзіць тры жылыя дамы па адным праекце: два – на вуліцы Ірынінскай і адзін – на вуліцы Кірава. Апошні прызначаўся для служачых чыгункі. У той час у савецкай архітэктуры сталі масава выкарыстоўвацца тыповыя праекты. Дом на Ірынінскай, 3, пачалі будаваць да вайны, але дабудаваць не паспелі. Канчаткова ён быў дабудаваны ўжо пасля вызвалення – у 1952 годзе. У ім знайшлася вось такая раскошная на першы погляд кватэрка на суткі. Праўда, пляма на канапе крыху псуе ўражанне. Кошт – 68 рублёў за суткі.
![](https://gomel.media/wp-content/uploads/2024/05/fef3f455-b6c1-4c51-ae6a-7592721b76fd.jpg)
![](https://gomel.media/wp-content/uploads/2024/05/24025160-35a7-4895-b400-d93512850c9e.jpg)
![](https://gomel.media/wp-content/uploads/2024/05/bc6a6d92-d830-4ee2-87d6-9ffd4edfc674.jpg)
![](https://gomel.media/wp-content/uploads/2024/05/8512a742-e768-4900-a9f6-009d7cc61c13.jpg)
На скрыжаванні Кірава з праспектам Перамогі стаіць яшчэ адзін тыпавы постканструктывісцкі дом, які быў завершаны пасля вайны. У будынку былі «парадныя» і «чорныя» ўваходы, тэрыторыя дома мела сваю агароджу з даволі прыгожай каванай брамай. Вось такая кватэра знайшлася тут. Кошт – 45 рублёў за суткі. Стыль абазначыны ў апісанні як лофт, хаця можна паспрачацца.
![](https://gomel.media/wp-content/uploads/2024/05/bc28ff6b6645749ee71c524c689472aa-1024x683.jpg)
![](https://gomel.media/wp-content/uploads/2024/05/photo1307329266-apartament-31664-ul-kirova-38.jpg)
Несавецкі інтэр’ер на Савецкай
Яшчэ адна кватэра, якая прыцягнула нашую ўвагу, знаходзіцца на вуліцы Савецкай, 3, у доме 1939 года пабудовы. Пагадзіцеся, двухузроўневая кватэра-студыя з цаглянымі сценамі выглядае незвычайна! У водгуках наведвальнікі дзеляцца ўражаннямі і адзначаюць цікавую гісторыю кватэры. На жаль, гаспадары не падзяліліся з намі падрабязнасцямі. Кошт пазначаны ад 60 рублёў.
![](https://gomel.media/wp-content/uploads/2024/05/85eae19f-d3cd-4199-9d05-ca39fd824cb9.jpg)
![](https://gomel.media/wp-content/uploads/2024/05/d9dbc849-b165-4eda-a5e2-7042770fbcb3.jpg)
![](https://gomel.media/wp-content/uploads/2024/05/d4c4ddcf-071f-4e61-9103-8f69c29aa1d8.jpg)
Самы прэстыжны даваенны дом у Гомелі
Апошнюю кватэру, якую хацелася б адзначыць, прапануюць у арэнду не на суткі, а на доўгі тэрмін. Знаходзіцца яна ў так званым доме спецыялістаў 1935 года пабудовы па адрасе Кірава, 35. Будынак узводзілі для вядучых спецыялістаў горада. На яго фасадах можна заўважыць ляпніну на пралетарскую тэматыку. А сама кватэра на чатыры пакоі выглядае вось так.
![](https://gomel.media/wp-content/uploads/2024/05/5dfc91cb-54c2-40d1-af98-0497ad540089.jpg)
![](https://gomel.media/wp-content/uploads/2024/05/db8d3f2c-2f82-40fe-b0a6-a5f810fded9c.jpg)
![](https://gomel.media/wp-content/uploads/2024/05/ffb65d16-a9fb-4b46-bbc2-458dbb5c3cd6.jpg)
![](https://gomel.media/wp-content/uploads/2024/05/dd488262-e95a-4e06-899a-dcf06c244959.jpg)
Кошт – 300 долараў за месяц.
Пакуль рыхтаваўся гэты матэрыял і праглядаліся дзясяткі самых розных кватэр у гістарычных будынках Гомеля, падумалася, што насамрэч гэта было б цікава – засяліцца на суткі ў інтэр’ер, які б не толькі адпавядаў густу і камфорту, але сапраўды пераносіў у нейкую гістарычную эпоху, дзякуючы мэблі і дэкаратыўным дэталям мінулага часу. Магчыма, і такое калі-небудзь з’явіцца на беларускім рынку.